پاکستان کے محکمہ موسمیات (پی ایم ڈی) نے جمعرات کو کہا ہے کہ 15 جون کو محرم الحرام 1448 ہجری کا چاند نظر آنے کے کوئی امکانات نہیں ہیں، کیونکہ چاند کی پیدائش اور غروب آفتاب کے درمیان وقفہ ہلال کی رویت کے لیے ناکافی ہوگا۔
محکمہ موسمیات نے آج جاری کردہ ایڈوائزری میں کہا ہے کہ ملک کے کئی حصوں میں موسم صاف رہنے کی توقع ہے تاہم چاند کی پیدائش 15 جون کی صبح 7 بج کر 54 منٹ پر ہونے کا امکان ہے، اس لیے یہ 29 ذی الحج کو غروب آفتاب تک نظر نہیں آئے گا۔
پی ایم ڈی نے ملک کے مختلف علاقوں میں چاند کے اوقات کی تفصیلات فراہم کرتے ہوئے کہا کہ پنجاب میں چاند شام 7 بج کر 59 منٹ پر، سندھ میں 8 بجکر 55 منٹ پر، خیبر پختونخوا میں رات 8 بج کر 23 منٹ پر اور بلوچستان میں رات 8 بج کر 34 منٹ پر غروب ہونے کی توقع ہے۔
گلگت بلتستان میں چاند رات 8 بجے غروب ہوگا جب کہ آزاد جموں و کشمیر میں رات 8 بج کر 7 منٹ پر نظر آئے گا۔
اسلامی سال کے آغاز سے متعلق حتمی اعلان مرکزی رویت ہلال کمیٹی پاکستان بھر سے شہادتیں موصول ہونے کے بعد کرے گی۔
اس حوالے سے محکمہ داخلہ پنجاب نے وزارت داخلہ کو خط لکھ کر محرم الحرام کے دوران سیکیورٹی انتظامات کے لیے صوبے بھر میں پاک فوج اور پاکستان رینجرز کے جوانوں کی تعیناتی کا مطالبہ کیا تھا۔
محکمہ داخلہ پنجاب کے ترجمان کے مطابق یہ درخواست پنجاب پولیس کی جانب سے محرم کے دوران اضافی سیکیورٹی معاونت کی سفارش کے بعد کی گئی۔
محکمہ نے پنجاب کے 39 اضلاع میں 137 کمپنیوں کی خدمات طلب کی ہیں تاکہ امن و امان برقرار رکھنے اور مذہبی مہینے کے دوران سیکورٹی کے انتظامات کو مضبوط بنایا جا سکے۔
